0:00
/
1ܒܗ̇ܘ ܙܲܒ̣ܢܵܐ ܒܸܚܕܵܪܵܐ ܗ݇ܘܵܐ ܝܼܫܘܿܥ ܒܫܲܒܬܵܐ ܓܵܘ ܚܲܩܠܵܢܹ̈ܐ: ܘܬܲܠܡܝܼܕܘܼ̈ܗܝ ܟܦܸܢܘܿܢ: ܘܫܘܼܪܹܠܗܘܿܢ ܠܸܫܠܵܓܵܐ ܒܘܼܠܹ̈ܐ ܘܠܹܐܟ̣ܵܠܵܐ. 2ܐܝܼܢܵܐ ܦܪ̈ܝܼܫܹܐ ܟܲܕ ܚܸܙܝܵܝܠܗܘܿܢ ܐܵܡܪܝܼ ܐܸܠܹܗ: ܗܵܐ: ܬܲܠܡܝܼܕܘܼ̈ܟ ܒܸܥܒ̣ܵܕܵܐ ܝܢܵܐ ܡܸܢܕܝܼ ܕܠܹܐ ܝܠܹܗ ܒܪܹܣܬܘܼܪ ܠܥܸܒ̣ܕܵܐ ܒܫܲܒܬܵܐ. 3ܐܝܼܢܵܐ ܗ̇ܘ ܐَܡܝܼܪܹܗ ܐܸܠܵܝܗܝ: ܠܵܐ ܩܪܹܐܠܵܘܟ̣ܘܿܢ ܡܘܼܕܝܼ ܥܒܸܕܠܹܗ ܕܵܘܝܼܕ ܟܲܕ ܟܦܸܢܹܗ: ܘܐܵܢܝܼ ܕܥܲܡܹܗ. 4ܕܵܐܟ̣ܝܼ ܥܒܼܸܪܹܗ ܠܒܲܝܬܵܐ ܕܐܲܠܵܗܵܐ: ܘܠܲܚܡܵܐ ܕܦܵܬܘܿܪܹܗ ܕܡܵܪܝܵܐ ܐܟܸܠܹܗ: ܗ̇ܘ ܕܠܹܐ ܗ݇ܘܵܐ ܒܕܲܣܬܘܼܪ ܐܸܠܹܗ ܠܹܐܟ̣ܵܠܵܐ: ܘܠܵܐ ܠܐܵܢܝܼ ܕܥܲܡܹܗ: ܐܸܠܵܐ ܐܸܢ ܠܟܵܗܢܹ̈ܐ ܒܢܲܦ̮ܫܵܝܗܝ. 5ܝܲܢ ܠܵܐ ܩܪܹܐܠܵܘܟ̣ܘܿܢ ܒܢܵܡܘܿܣܵܐ: ܕܟܵܗܢܹ̈ܐ ܓܵܘ ܗܲܝܟܠܵܐ ܟܹܐ ܫܵܪܝܼ ܠܫܲܒܬܵܐ: ܘܕܠܵܐ ܠܵܘܡܵܐ ܝܢܵܐ. 6ܐܝܼܢܵܐ ܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܘܼܫ ܓܘܼܪܵܐ ܡ̣ܢ ܗܲܝܟܠܵܐ ܐܝܼܬ ܠܲܐܟ̣ܵܐ. 7ܐܝܼܢܵܐ ܐܸܢ ܗܵܘܹܝܬܘܿܢ ܗ݇ܘܵܘ ܒܝܼܕܵܥܝܵܐ ܡܘܼܕܝܼ ܝܠܹܗ: ܪ̈ܲܚܡܹܐ ܒܸܒܥܵܝܵܐ ܝܘܸܢ ܘܠܵܐ ܕܸܒ̣ܚܬܵܐ: ܠܹܐ ܥܵܒ̣ܕܝܼܬܘܿܢ ܗ݇ܘܵܘ ܓܘܼܢܗܵܟܵܪ ܠܐܵܢܝܼ ܕܕܠܵܐ ܠܵܘܡܵܐ ܝܢܵܐ. 8ܣܵܒܵܒ ܡܵܪܵܐ ܕܫܲܒܬܵܐ ܒܪܘܿܢܹܗ ܕܐ݇ܢܵܫܵܐ ܝܠܹܗ. 9ܘܫܘܼܢܹܐܠܹܗ ܡ̣ܢ ܬܵܡܵܐ ܘܐَܬܹܐܠܹܗ ܠܟܢܘܼܫܬܵܝܗܝ. 10ܘܗܵܐ: ܚܲܕَ ܐ݇ܢܵܫܵܐ ܐܝܼܬ ܗ݇ܘܵܐ ܬܵܡܵܐ ܕܐܝܼܕܹܗ ܒܪܝܼܙܬܵܐ: ܘܒܵܩܪܝܼ ܗ݇ܘܵܘ ܡܸܢܹܗ ܘܐܵܡܪܝܼ: ܐܸܢ ܒܕܲܣܬܘܼܪ ܝ݇ܠܵܗ̇ ܒܫܲܒܬܵܐ ܠܒܵܣܘܿܡܹܐ: ܕܡܵܚܝܼ ܗ݇ܘܵܘ ܕܲܪܗܲܩܹܗ. 11ܐܝܼܢܵܐ ܐَܡܝܼܪܹܗ ܐܸܠܵܝܗܝ: ܡܵܢܝܼ ܝܠܹܗ ܐ݇ܢܵܫܵܐ ܡܸܢܵܘܟ̣ܘܿܢ ܕܐܝܼܬ ܠܹܗ ܚܲܕَ ܥܸܪܒܵܐ: ܘܐܸܢ ܢܵܦܸܠ ܒܒܹܪܵܐ ܒܝܵܘܡܵܢܹ̈ܐ ܕܫܲܒܬܵܐ: ܠܹܐ ܕܵܒܸܩ ܘܡܲܩܸܡ ܠܹܗ. 12ܐܝܼܢܵܐ ܟܡܵܐ ܙܵܘܕܵܐ ܝܠܹܗ ܒܲܪܢܵܫܵܐ ܡ̣ܢ ܥܸܪܒܵܐ: ܒܲܣ ܒܕܲܣܬܘܼܪ ܝ݇ܠܵܗ̇ ܒܫܲܒܬܵܐ ܠܸܥܒ̣ܵܕܵܐ ܕܨܦܵܝܝܼ. 13ܗ̇ܝܓܵܗ ܐَܡܝܼܪܹܗ ܠܗ̇ܘ ܐ݇ܢܵܫܵܐ: ܦܵܫܸܛ ܐܝܼܕܘܼܟ: ܘܦܘܼܫܛܵܠܹܗ: ܘܬܪܸܨܠܵܗ̇: ܐܲܝܟܼ ܕܗ̇ܝ ܐܚܹܪَܬܵܐ. 14ܘܦܠܸܛܠܗܘܿܢ ܦܪ̈ܝܼܫܹܐ: ܘܥܒܸܕܠܗܘܿܢ ܪܵܐܝܝܼ ܥܲܠܘܼܗܝ ܕܬܵܠܩܝܼ ܗ݇ܘܵܘ ܠܹܗ. 15ܐܝܼܢܵܐ ܝܼܫܘܿܥ ܝܕܸܥܠܹܗ: ܘܫܘܼܢܹܐܠܹܗ ܡ̣ܢ ܬܵܡܵܐ: ܘܐَܙܸܠܗܘܿܢ ܒܵܬَܪܹܗ ܟܸܢܫܹ̈ܐ ܪܵܒܵܐ: ܘܒܘܼܣܸܡܠܹܗ ܠܟܠܵܝܗܝ. 15ܘܢܓܸܘܼܠܹܗ ܒܝܼܵܝܗܝ ܕܠܵܐ ܓܵܠܝܼ ܗ݇ܘܵܘ ܠܹܗ. 17ܕܦܵܐܹܫ ܬܘܼܡܸܡܵܐ ܡܸܢܕܝܼ ܕܦܸܫܠܹܗ ܐَܡܝܼܪܵܐ ܒܝܲܕ ܢܒ̣ܝܼܵܐ: ܕܐَܡܝܼܪܹܗ. 18ܗܵܐ: ܪܹܓܝܼ ܕܓܘܼܒܹܐܠܝܼ: ܡܘܼܚܸܒܝܼ ܕܒܝܹܗ ܓܵܢܝܼ ܒܸܒܣܵܡܘܼܗ̇ ܝ݇ܠܵܗ̇. ܪܘܼܚܝܼ ܒܸܬ ܡܲܬܒܸܢ ܥܲܠܘܼܗܝ: ܘܕܝܼܘܵܢ ܠܛܵܝܸܦܹ̈ܐ ܒܸܬ. ܡܲܕܸܥ. 19ܠܹܐ ܡܲܩܪܸܨ: ܘܠܹܐ ܡܲܩܘܸܚ: ܘܐ݇ܢܵܫܵܐ ܩܵܠܹܗ ܠܹܐ ܫܵܡܹܥ ܒܥܵܠܘܿܠܹ̈ܐ. 20ܙܹܠܵܐ ܛܒ̣ܝܼܚܵܐ ܠܹܐ ܬܵܒܸܪ: ܘܫܪܵܝܵܐ ܕܛܲܦܛܸܦܵܐ ܠܹܐ ܡܲܟ̰ܡܹܐ: ܗܲܠ ܕܦܵܠܸܛ ܕܝܼܘܵܢ ܠܓ̣ܵܠܸܒܘܼܬܵܐ. 21ܘܒܫܸܡܹܗ ܛܵܝܸܦܹ̈ܐ ܒܸܬ ܣܵܒܪܝܼ. 22ܗ̇ܝܓܵܗ ܦܸܫܠܹܗ ܡܘܼܬَܝܵܐ ܠܟܸܣܠܹܗ ܚܲܕَ ܕܲܝܘܵܢܵܐ ܕܠܲܥܠܵܐ ܘܣܸܡܝܵܐ: ܘܒܘܼܣܸܡܠܹܗ: ܕܵܐܟ̣ܝܼ ܕܠܲܥܠܵܐ ܘܣܸܡܝܵܐ ܗܲܡܙܸܡ ܘܚܵܙܹܐ ܗ݇ܘܵܐ. 23ܘܥܵܓ̰ܒܝܼ ܗ݇ܘܵܘ ܟܠܵܝܗܝ ܟܸܢܫܹ̈ܐ ܘܐܵܡܪܝܼ: ܠܹܐ ܝܠܹܗ ܐܵܗܵܐ ܒܪܘܿܢܹܗ ܕܕܵܘܝܼܕ. 24ܐܝܼܢܵܐ ܦܪ̈ܝܼܫܹܐ ܟܲܕ ܫܡܸܥܠܗَܘܿܢ: ܐܵܡܪܝܼ: ܐܵܗܵܐ ܠܹܐ ܝܠܹܗ ܦܵܠܘܿܛܹܐ ܕܲܝܘܹ̈ܐ: ܫܒ̣ܘܿܩ ܡ̣ܢ ܒܒܥܸܠܙܒ̣ܘܼܒ̣ ܪܹܫܵܐ ܕܕܲܝܘܹ̈ܐ. 25ܐܝܼܢܵܐ ܝܼܫܘܿܥ ܝܕܸܥܠܹܗ ܚܘܼܫܵܒ̣ܵܝ̈ܗܝ: ܘܐَܡܝܼܪܹܗ ܐܸܠܵܝܗܝ: ܟܠ ܡܲܠܟܘܼܬܵܐ ܕܦܵܝܫܵܐ ܕܘܼܒܵܪ ܥܲܠ ܓܵܢܘܼܗ̇ ܒܸܬ ܚܵܪܒ̣ܵܐ: ܘܟܠ ܒܲܝܬܵܐ ܘܡܕܝܼܢَܬܵܐ ܕܦܵܐܹܫ ܕܘܼܒܵܪ ܥܲܠ ܓܵܢܹܗ ܠܹܐ ܟܵܠܹܐ. 26ܘܐܸܢ ܣܵܛܵܢܵܐ ܠܣܵܛܵܢܵܐ ܦܵܠܸܛ: ܥܲܠ ܓܵܢܹܗ ܦܸܫܠܹܗ ܕܘܼܒܵܪ. ܒܲܣ ܕܵܐܟ̣ܝܼ ܒܸܬ ܟܵܠܝܵܐ ܡܲܠܟܘܼܬܹܗ. 27ܘܐܸܢ ܐܵܢܵܐ ܒܒܥܸܠܙܒ̣ܘܿܒ̣ ܦܵܠܘܿܛܹܐ ܝܘܸܢ ܕܲܝܘܹ̈ܐ: ܒܢܘܿܢܵܘ̈ܟ̣ܘܿܢ ܒܡܵܢܝܼ ܟܹܐ ܦܵܠܛܝܼ ܠܗ݇ܘܿܢ: ܣܵܒܵܒ ܕܐܵܗܵܐ ܐܵܢܝܼ ܒܸܬ ܗܵܘܝܼ ܐܸܠܵܘܟ̣ܘܿܢ ܕܲܝܵܢܹ̈ܐ. 28ܘܐܸܢ ܒܪܘܼܚܵܐ ܕܐܲܠܵܗܵܐ ܐܵܢܵܐ ܦܵܠܘܿܛܹܐ ܝܘܸܢ ܕܲܝܘܹ̈ܐ: ܒܲܣ ܩܘܼܪܒܸܢܵܗ̇ ܥܲܠܵܘܟ̣ܘܿܢ ܡܲܠܟܘܼܬܵܐ ܕܐܲܠܵܗܵܐ. 29ܝܲܢ ܕܵܐܟ̣ܝܼ ܡܵܨܹܐ ܐ݇ܢܵܫܵܐ ܥܵܒܼܸܪ ܠܒܲܝܬܹܗ ܕܙܲܪܒܵܢܵܐ ܘܡܸܢܕ̈ܝܹܗ ܣܵܠܸܒ: ܐܸܢ ܠܵܐ ܕܩܵܕَܡܵܝܬܵܐ ܐܵܣܸܪ ܠܙܲܪܒܵܢܵܐ: ܘܗ̇ܝܓܵܗ ܒܸܬ ܣܵܠܸܒ ܒܲܝܬܹܗ. 30ܡ̇ܢ ܕܠܵܐ ܗܵܘܹܐ ܥܲܡܝܼ ܕܲܪܩܘܼܒ̣ܠܝܼ ܝܠܹܗ: ܘܡ̇ܢ ܕܠܵܐ ܓ̰ܲܡܸܥ ܥܲܡܝܼ ܟܹܐ ܒܲܪܒܸܙ. 31ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܟܠ ܚܛܝܼܬܵܐ ܘܓܘܼܕܵܦܵܐ ܒܸܬ ܦܵܝܫܝܼ ܫܒ̣ܝܼܩܹܐ ܠܒܢܲܝ̈ܢܵܫܵܐ: ܐܝܼܢܵܐ ܓܘܼܕܵܦܵܐ ܕܥܲܠ ܪܘܼܚܵܐ ܠܹܐ ܦܵܐܹܫ ܫܒ̣ܝܼܩܵܐ ܠܒܢܲܝ̈ܢܵܫܵܐ. 32ܘܟܠ ܡ̇ܢ ܕܐܵܡܸܪ ܗܹܡܸܙܡܵܢ ܥܲܠ ܒܪܘܿܢܹܗ ܕܐ݇ܢܵܫܵܐ: ܒܸܬ ܦܵܐܹܫ ܫܒ̣ܝܼܩܵܐ ܐܸܠܹܗ: ܐܝܼܢܵܐ ܟܠ ܕܥܲܠ ܪܘܼܚܵܐ ܕܩܘܼܕܫܵܐ ܐܵܡܸܪ: ܠܹܐ ܦܵܐܹܫ ܫܒ̣ܝܼܩܵܐ ܐܸܠܹܗ: ܠܵܐ ܒܐܵܗܵܐ ܥܵܠܡܵܐ: ܘܠܵܐ ܒܥܵܠܡܵܐ ܕܐܵܬܹܐ. 33ܝܲܢ ܥܒ̣ܘܿܕܘܿܢ ܐܝܼܠܵܢܵܐ ܨܦܵܝܝܼ ܘܛܥܘܿܢܝܵܬܘܼ̈ܗܝ ܨܦܵܝܝܼ: ܝܲܢ ܥܒ̣ܘܿܕܘܿܢ ܐܝܼܠܵܢܵܐ ܚܸܪܒܵܐ: ܘܛܥܘܿܢܵܝܬܘܼ̈ܗܝ ܚܸܪܒܵܐ. ܣܵܒܵܒ ܡ̣ܢ ܛܥܘܿܢܝܵܬܘܼ̈ܗܝ ܟܹܐ ܦܵܐܹܫ ܝܕܸܥܝܵܐ ܐܝܼܠܵܢܵܐ. 34ܝܵܐ ܙܲܪܥܵܐ ܕܐܵܟܸܕܢܹ̈ܐ: ܕܵܐܟ̣ܝܼ ܡܵܨܹܝܬܘܿܢ ܛܵܒ̣ܵܬܹ̈ܐ ܠܗܲܡܙܘܼܡܹܐ ܟܲܕ ܒܝܼܫܹ̈ܐ ܝܬܘܿܢ. ܣܵܒܵܒ ܡ̣ܢ ܙܵܘܕܘܼܢܝܘܬܐ ܕܠܸܒܵܐ ܟܹܐ ܗܲܡܙܸܡ ܦܘܼܡܵܐ. 35ܐ݇ܢܵܫܵܐ ܛܵܒ̣ܵܐ ܡ̣ܢ ܚܲܙܝܼܢܵܐ ܛܵܒ̣ܬܵܐ ܟܹܐ ܦܵܠܸܛ ܛܵܒ̣ܵܬܹ̈ܐ: ܘܐ݇ܢܵܫܵܐ ܒܝܼܫܵܐ ܡ̣ܢ ܚܲܙܝܼܢܵܐ ܒܝܼܫܬܵܐ ܟܹܐ ܦܵܠܸܛ ܒܝܼܫܵܬܹ̈ܐ. 36ܐܝܼܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܗܹܡܸܙܡܵܢ ܒܲܛܝܼܠܬܵܐ ܕܐܵܡܪܝܼ ܒܢܲܝ̈ܢܵܫܵܐ: ܒܸܬ ܝܵܗَܒ̣ܝܼ ܓ̰ܘܼܘܵܒܘܼܗ̇ ܒܝܵܘܡܵܢܹ̈ܐ ܕܕܝܼܘܵܢ. 37ܣܵܒܵܒ ܡ̣ܢ ܗܹܡܸܙܡܵܢܘܼ̈ܟ ܒܸܬ ܦܵܝܫܸܬ ܡܘܼܟܫܸܛܵܐ: ܘܡ̣ܢ ܗܹܡܸܙܡܵܢܘܼ̈ܟ ܒܸܬ ܦܵܝܫܸܬ ܥܒ̣ܝܼܕܵܐ ܓܘܼܢܗܵܟܵܪ. 38ܗ̇ܝܓܵܗ ܓ̰ܘܼܘܸܒܠܗܘܿܢ ܐ݇ܢܵܫܹ̈ܐ ܡ̣ܢ ܣܵܦܪܹ̈ܐ ܘܡ̣ܢ ܦܪ̈ܝܼܫܹܐ: ܒܹܐܡܵܪܵܐ ܐܸܠܹܗ: ܡܲܠܦܵܢܵܐ: ܒܸܒܥܵܝܵܐ ܝܘܵܚ ܕܚܵܙܵܚ ܡܸܢܘܼܟ ܢܝܼܫܲܢܩܵܐ. 39ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܵܝܗܝ: ܐܘܼܓ̰ܵܓ̣ ܒܝܼܫܬܵܐ ܘܩܲܗܒܵܐ ܢܝܼܫܲܢܩܵܐ ܒܸܒܥܵܝܵܐ ܝ݇ܠܵܗ̇: ܘܢܝܼܫܲܢܩܵܐ ܠܹܐ ܦܵܐܹܫ ܝܘܼܗَܒ̣ܵܐ ܐܸܠܵܗ̇: ܫܒ̣ܘܿܩ ܡ̣ܢ ܢܝܼܫܲܢܩܵܐ ܕܝܵܘܢܵܢ ܢܒ̣ܝܼܵܐ. 40ܣܵܒܵܒ ܕܵܐܟ̣ܝܼ ܕܗَܘܹܠܹܗ ܝܵܘܢܵܢ ܓܵܘ ܟܹܪَܣܵܗ̇ ܕܢܘܼܢܵܐ ܓܘܼܪܬܵܐ ܬܠܵܬَܐ ܐܝܼܡܵܡܹ̈ܐ ܘܬܠܵܬَܐ ܠܲܝܠܵܘܵܬܹ̈ܐ: ܗܲܕܟ̣ܵܐ ܒܸܬ ܗܵܘܹܐ ܒܪܘܿܢܹܗ ܕܐ݇ܢܵܫܵܐ ܒܠܸܒܵܗ̇ ܕܐܲܪܥܵܐ ܬܠܵܬَܐ ܐܝܼܡܵܡܹ̈ܐ ܘܬܠܵܬَܐ ܠܲܝܠܵܘܵܬܹ̈ܐ. 41ܐ݇ܢܵܫܹ̈ܐ ܢܝܼܢܘܵܝܹ̈ܐ ܒܸܬ ܩܵܝܡܝܼ ܒܕܝܼܘܵܢ ܥܲܡ ܕܐܵܗܵܐ ܐܘܼܓ̰ܵܓ̣: ܘܒܸܬ ܥܵܒ̣ܕܝܼ ܠܵܗ̇ ܓܘܼܢܵܗܟܵܪ: ܣܵܒܵܒ ܕܐܵܢܝܼ ܬܘܼܘܸܒܠܗܘܿܢ ܒܟܵܪܘܿܙܘܼܬܹܗ ܕܝܵܘܢܵܢ: ܘܗܵܐ: ܕܒܘܼܫ ܓܘܼܪܵܐ ܡ̣ܢ ܝܵܘܢܵܢ ܠܲܐܟ̣ܵܐ. 42ܡܲܠܟܬܵܐ ܕܬܲܝܡܢܵܐ ܒܸܬ ܩܵܝܡܵܐ ܒܕܝܼܘܵܢ ܥܲܡ ܕܐܵܗܵܐ ܐܘܼܓ̰ܵܓ̣ ܘܒܸܬ ܥܵܒ̣ܕܵܗ̇ ܠܵܗ̇ ܓܘܼܢܵܗܟܵܪ: ܣܵܒܵܒ ܕܗ̇ܝ ܐَܬܹܐܠܵܗ̇ ܡ̣ܢ ܡܲܪ̈ܙܵܢܹܐ ܕܐܲܪܥܵܐ ܕܫܵܡܥܵܐ ܥܵܩܸܠܕܵܪܘܼܬܹܗ ܕܫܠܹܝܡܘܿܢ: ܘܗܵܐ ܕܒܘܼܫ ܓܘܼܪܵܐ ܡ̣ܢ ܫܠܹܝܡܘܿܢ ܠܲܐܟ̣ܵܐ. 43ܐܝܼܡܲܢ ܕܪܘܼܚܵܐ ܛܲܡܹܐܐ ܦܵܠܛܵܐ ܡ̣ܢ ܐ݇ܢܵܫܵܐ: ܟܹܐ ܚܵܕܪܵܐ ܒܕܘܼܟܵܢܹ̈ܐ ܕܡ̈ܝܼܵܐ ܠܲܝܬ ܒܝܼܵܝܗܝ: ܒܸܛܲܥܝܵܐ ܠܢܝܵܚܵܐ: ܘܠܹܐ ܡܲܫَܟ̰ܚܵܐ. 44ܗ̇ܝܓܵܗ ܟܹܐ ܐܵܡܪܵܐ: ܒܸܬ ܕܵܝܪܵܢ ܠܒܲܝܬܝܼ ܡܐܲܝܟܵܐ ܕܦܠܸܛܠܝܼ: ܘܟܲܕ ܐܵܬܝܵܐ: ܟܹܐ ܡܲܫَܟ̰ܚܵܐ ܠܹܗ ܣܦܝܼܩܵܐ ܘܟܢܝܼܫܵܐ ܘܣܘܼܩܠܵܐ. 45ܗ̇ܝܓܵܗ ܟܹܐ ܐܵܙܵܠَܐ ܠܵܒܠܵܐ ܥܲܡܵܗ̇ ܫܲܒܲܥ ܪ̈ܘܼܚܹܐ ܐ݇ܚܹܪ̈݇ܢܹܐ ܒܘܼܫ ܒܝܼܫܹ̈ܐ ܡ̣ܢ ܓܵܢܘܼܗ̇: ܘܟܹܐ ܥܵܒܼܪܝܼ ܘܥܵܡܪܝܼ ܬܵܡܵܐ: ܘܟܹܐ ܗܵܘܝܵܐ ܚܲܪܬܹܗ ܕܗ̇ܘ ܐ݇ܢܵܫܵܐ ܒܘܼܫ ܚܸܪܒܵܐ ܡ̣ܢ ܩܵܕَܡܵܝܬܵܐ. ܗܲܕܟ̣ܵܐ ܒܸܬ ܗܵܘܹܐ ܠܐܵܗܵܐ ܐܘܼܓ̰ܵܓ̣ ܒܝܼܫܬܵܐ. 46ܐܝܼܢܵܐ ܟܲܕ ܗ̇ܘ ܗܲܡܙܘܼܡܹܐ ܗ݇ܘܵܐ ܠܟܸܢܫܹ̈ܐ: ܗܵܐ: ܝܸܡܹܗ ܘܐܵܚܘܿܢܘܵܬܹ̈ܗ ܟܸܠܝܹܐ ܗ݇ܘܵܘ ܠܒܲܕܲܪ: ܒܸܒܥܵܝܵܐ ܕܗܲܡܙܸܡܝܼ ܥܲܡܹܗ. 47ܘܐَܡܝܼܪܹܗ ܐܸܠܹܗ ܚܲܕَ ܐ݇ܢܵܫܵܐ: ܗܵܐ: ܝܸܡܘܼܟ ܘܐܵܚܘܿܢܘܵܬܘܼ̈ܟ ܟܸܠܝܹܐ ܝܢܵܐ ܠܒܲܕܲܪ: ܘܒܵܥܝܼ ܕܗܲܡܙܸܡܝܼ ܥܲܡܘܼܟ. 48ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ ܠܗ̇ܘ ܕܐَܡܝܼܪܹܗ ܐܸܠܹܗ: ܡܵܢܝܼ ܝ݇ܠܵܗ̇ ܝܸܡܝܼ: ܘܡܵܢܝܼ ܝܢܵܐ ܐܵܚܘܿܢܘܵܬܝܼ̈. 49ܘܦܘܼܫܛܵܠܹܗ ܐܝܼܕܹܗ ܠܟܸܣ ܬܲܠܡܝܼܕܘܼ̈ܗܝ: ܘܐَܡܝܼܪܹܗ: ܗܵܐ: ܝܸܡܝܼ ܘܐܵܚܘܿܢܘܵܬܝ̈. 50ܣܵܒܵܒ ܟܠ ܐ݇ܢܵܫܵܐ ܕܥܵܒܸܕ ܪܸܙܵܝܹܗ ܕܒܵܒܝܼ ܕܒܫܡܲܝܵܐ: ܗ̇ܘ ܝܼܠܹܗ ܐܵܚܘܿܢܝܼ ܘܚܵܬܝܼ ܘܝܸܡܝܼ.